Татарстанда 2025 елга массакүләм диспансерлаштыруга йомгак ясалды

2025 ел нәтиҗәләре буенча, Татарстан Республикасында «Озын һәм актив тормыш» милли проекты кысаларында авыруларны иртә ачыклау буенча чаралар активлашкан. Профилактика максатларында табиблар йөзләрчә мең кешене тикшергән, тикшерүләр вакытында 108 меңнән артык төрле авыру ачыкланган. Авырулар арасында 1524 яман шеш очрагы расланган. 85% тан артыгы даими диспансер учетына алынган.  

Шул ук вакытта һәр бишенче кеше сәламәт дип табылган. Тикшерелгәннәрнең якынча 10 процентында белгечләр билгеле бер авырулар үсеше куркынычын ачыклаган, бу исә вакытында профилактика чараларын күрергә мөмкинлек биргән. Татарстанда диспансер исәбендә барлыгы 1,2 миллионнан артык кеше тора.

Репродуктив сәламәтлеккә аерым игътибар бирелә. "Гаилә" илкүләм проекты кысаларында 2025 елда 18 яшьтән 49 яшькә кадәрге Татарстанда яшәүче 450 меңнән артык кеше махсус диспансерлаштыру узган. Бу әлеге яшь категориясендәге барлык халыкның өчтән бер өлешен тәшкил итә.

Сәнәгать диспансеризациясе дә актив үсә, анда республиканың 72 медицина оешмасы һәм 933 предприятиесе катнаша. Ике ел эчендә мондый тикшерүләр күләме ике тапкырга диярлек арткан. Беренче этапны узган хезмәткәрләрнең 10%тан артыгы өстәмә тикшерүгә җибәрелгән.

Авыл җирендә медицинадан файдалану мөмкинлеген тәэмин итү мөһим юнәлеш булып кала. Моның өчен төбәктә 27 күчмә комплекс эшли, шуларның бишесе - тулысынча җиһазландырылган мобиль поликлиникалар. Алар ярдәмендә белгечләр ерак авылларга чыга ала. 2025 елда күчмә поликлиникалар авылларга 90 мең тапкыр чыкканнар.

Соңгы биш елда мобиль поликлиникалар 775 торак пунктта булып, 190 мең пациентны караган һәм 25 меңнән артык яңа авыруны ачыклаган. Бу чорда мондый комплексларга ел саен килүчеләр саны 3,5 тапкырга арткан.

Гражданнарның сәламәтлеген саклауга һәм ныгытуга юнәлдерелгән «Озын һәм актив тормыш» һәм «Гаилә» милли проектлары кысаларында киң колачлы эш алып барыла.