Илкүләм проектлар Татарстан хастаханәләре эшен яхшыртырга ярдәм итә

2020 елда Татарстан 11 милли проект кысаларында 50 федераль (төбәк) проектын тормышка ашыруда катнашты. Сәламәтлек саклау тармагында аеруча балалар хастаханәләренә күп игътибар бирелде. Мисал өчен, республикадагы 31 сәламәтлек саклау учреждениесендә нәниләрне кабул итү, аларга медицина хезмәте күрсәтү өчен уңай шартлар тудырылды. Бу хакта милли проектларның республика территориясендә ничек үтәлүен контрольдә тотучы ТР Икътисад министрлыгы хәбәр итә.

Тагын шунысын әйтергә кирәк, узган ел республикада яңа 7 фельдшер-акушерлык пункты файдалануга тапшырылган, Казанда Балалар онкологиясе, гематология һәм хирургиясе үзәге төзелә башлаган.

Республикадагы шәһәр һәм районнарны төзекләндерү буенча да күп нәрсәләр эшләнгән. Әйтик, 51 шәһәр мохиты объекты төзекләндерелгән, 268 километрдан артык юл тәртипкә китерелгән.

Республикада милли проектлар буенча киләчәктә дә шактый эшләр башкаруны планлаштыралар. 2021 елда әлеге максатларда 21 миллиард сум акча тотылачак.