Казан-Ульяновск трассасындагы авариядә ике кеше һәлак булды

Казан-Ульяновск трассасында һәлакәттә Югары Ослан районында яшәүче ике кеше – 30 яшьлек шофер һәм 59 яшьлек такси пассажиры һәлак булган.

Район ЮХИДИ мәгълүматларына караганда, төнлә Р-241 трассасында куркыныч юл-транспорт һәлакәте килеп чыга. Такси йөртүче, узу тыелган зонада каршы як полосасына чыгып, бакча инвентаре һәм инструментлары төягән зур йөк машинасына бәрелә.

Бәрелү нәтиҗәсендә җиңел машинаның алгы өлеше деформацияләнә, ә салонда ике кеше шунда һәлак була.

Йөк машинасы бәрелүдән яна башлый. Шофер салоннан чыгып өлгерә, ул зыян күрми. Янган фураны коткару хезмәтләре сүндерә.

Авария факты буенча прокурор тикшерүе бара.