Болгар кешесе суд залыннан ук хөкемне үтәү өчен җибәрелә

Балигъ булмаганга кул күтәргән өчен Болгар кешесе берничә тәүлеккә  административ кулга алынды.

Бу кеше салмыш баштан яшүсмер белән бәхәсләшеп киткән һәм яшүсмерне муеныннан эләктереп алган. Суд утырышында ир үз гаебен өлешчә танып, яшүсмер белән бары сөйләшергә генә теләвен, ә зыян китерегә теләмәвен аңлата.

Җыелган материаллар нигезендә, суд хокук бозучы китергән дәлилләрнең факттагы хәлгә туры килмәвен таный. Нәтиҗәдә ир-атны гаепле дип таныйлар һәм административ кулга алынуга хөкем итәләр.

Гаепләнүче суд залыннан ук җәзаны үтәү өчен район полиция бүлегенең административ тәртиптә кулга алынган затларны тоту өчен махсус бүлмәсенә җибәрелде.