Ауда танышын атып үтергән Ульяновск кешесен Татарстанда хөкем итәчәкләр

Очраклы рәвештә танышын атып үтергән 58 яшьлек Ульяновск кешесенең эше Нурлат район судында тикшереләчәк.

Фаҗига узган елның 6 декабрендә була. Алты ир-ат Нурлат районындагы Хурал Ту (Караульная Гора) авылы янына ауга киләләр. Аудан соң өйгә кайтырга җыенганда, 58 яшьлек Ульяновскида яшәүче ир-ат ау кирәк-яракларын багажникка тутыра башлый һәм очраклы рәвештә коралның тәтесенә баса. Пуля машинаның арткы утыргычында утырган 40 яшьлек ир-атка тия. Нәтиҗәдә зыян күрүче хстаханәгә барганда юлда җан бирә.

Корал хуҗасын саксызлык буенча кеше үтерүдә гаеплиләр. Эш Нурлат район судында каралачак.