ТР буенча Социаль фонд бүлеге 216 млн сумлык бала табу сертификатлары биргән

2025 ел башыннан Татарстан Республикасы буенча Социаль фонд бүлеге 22 меңнән артык хатын-кызга бала тудыру сертификатлары буенча түләп, финанс ярдәме күрсәткән. Бу максатларга республиканың медицина учреждениеләренә 242 миллион сумнан артык акча җибәрелде, бу йөклелек, бала табу чорында сыйфатлы медицина ярдәме күрсәтүне һәм беренче елда балаларны профилактик күзәтүне тәэмин итте.

Электрон бала тудыру сертификаты хатын-кызлар консультациясенә, бала тудыру йортына яки балалар поликлиникасына беренче визит вакытында автомат рәвештә формалаштырыла. Аны рәсмиләштерү өчен булачак әнигә паспорт, мәҗбүри медицина иминияте полисы һәм СНИЛС бирергә кирәк. Медицина оешмасы сертификатны исәпкә куелганнан соң бер эш көне эчендә төзи, ә бөтен мәгълүмат дәүләт хезмәтләре порталында шәхси кабинетта ачык була.

"2025 елда бала табу сертификатының гомуми бәясе 12 мең сум тәшкил итә. Акча барлык этаплар арасында бүленә: 3 мең сум — йөклелек вакытында амбулатор күзәтүгә, 1 мең сум-хокукый, психологик һәм медик — социаль ярдәмгә, 6 мең сум — бала тапканда һәм бала тапканнан соң медицина ярдәменә, тагын 2 мең сум-беренче елда баланы профилактик тикшерүгә җибәрелә. Шул ук вакытта шуны аңлау мөһим: күрсәтелгән түләүләр хатын-кызның үзенә түгел, ә тиешле хезмәтләр күрсәткән медицина оешмасына күчерелә. 

Әгәр хатын-кыз түләүле клиникада күзәтелә икән, сертификат төзелә, ләкин ул түләнми», — дип ассызыклады Татарстан Республикасы буенча Социаль фонд бүлеге идарәчесе Эдуард Вафин.