Татарстанда М-5 юлында буран аркасында автобуслар һәм фуралар өчен хәрәкәтне яптылар

20 февралььдә «Урал» М-5 федераль трассасында вакытлыча чикләүләр керттеләр. Сәбәбе – көчле җил, буран, мул кар яву һәм начар күрү мөмкинлеге.

Хәрәкәтне пассажир автобуслары, маршрут таксилары һәм йөк транспорты өчен тыйдылар. Чикләү 1194,5 км (Самара өлкәсе белән чик) 1363 км (Иске Богады торак пункты) өзегендә гамәлдә. Юл Оренбург өлкәсе, Татарстан һәм Башкортстан территорияләре аша уза.

Татарстанда тыюга эләктеләр:
- Бөгелмә районында – гомуми озынлыгы 8,68 км булган өч участок;
- Баулы районында –  2,475 км озынлыктагы бер участок.

Чикләүләрне бетерүнең якынча вакыты – 20 февральдә 13:00. Ләкин барысы да һава торышына бәйле: буран басылмаса, вакыт кичектерелергә мөмкин.

Машина йөртүчеләргә сәфәрләрне планлаштырганда бу мәгълүматны исәпкә алырга һәм мөмкин булганча һава торышының яхшыруын көтәргә киңәш итәләр. Үзгәрешләрне юл хезмәтләренең рәсми ресурсларында карап була.