Татарстанда «Игелекле Татарстан» волонтерлар форумы узды

9-11 декабрьдә Татарстанда ел саен үткәрелә торган өченче «Игелекле Татарстан» Республика форумы узды. Чарага республиканың 45 районыннан һәм шәһәреннән 200 актив волонтер һәм волонтерлык үзәкләре җитәкчеләре җыелды. Форум гражданлык активлыгына ярдәм итүгә юнәлдерелгән һәм «Яшьләр һәм балалар» милли проекты максатларының берсе булып тора.

Татарстан Республикасы Яшьләр эшләре министры Азат Кадыйров билгеләп үткәнчә, форум өч ел эчендә волонтерларны укыту һәм диалог өчен төп мәйданчыкка әверелә. 

- Аларның энергиясе һәм эш итәргә әзерлеге — ул бөтен төбәкне үстерү өчен куәтле ресурс. Доброволецлык хәрәкәтенә ярдәм итү — безнең төп бурыч, чөнки ул төрле яшьтәге һәм төрле һөнәр ияләрен берләштерә, җаваплылык мәктәбенә әверелә, - дип ассызыклады министр.

Беренче көн программасы Биектау районында узды. Анда конкурсларда җиңүчеләр белән очрашулар, җитәкчеләр өчен стресс-тренинглар һәм укыту мастер-класслары кертелгән иде. Шуларның берсе - Бөтенроссия саңгыраулар җәмгыятенең төбәк бүлеге тарафыннан оештырылган ишарәләр теле дәресе булды.

Форумның икенче көне Казанда, Бәшир Рәмиев исемендәге ИТ-паркта узды. Анда «Мәрхәмәтле Татарстан» республика конкурсында җиңүчеләрне бүләкләү тантанасы булды. Быел конкурска барлык муниципалитетлардан 517 гариза алынды. «Елның героик гамәле» һәм «Инклюзия өлкәсендә ел волонтеры» дигән яңа номинацияләр кертелде. Төп бүләкне — «Татарстан Республикасының ел волонтеры-2025» Гран-присын Саимә Шаһиәхмәтова алды. Бүләкләү тантанасын ТР Премьер-министры урынбасары Ләйлә Фазлыева һәм Татарстанның халык артисты Салават Фәтхетдинов үткәрде. Шулай ук 2026 елдан конкурс доброволецлык өлкәсендә Татарстан Республикасы Рәисе премиясенә үзгәртелә дип игълан ителде.

Форум чараларында барлыгы ике меңнән артык кеше катнашты. Оештыру комитеты башкарма директоры Айрат Мөбәрәкшин йомгак ясады: 

- Игелекнең вакыт кысалары юк. Безнең форум - ул тәҗрибә һәм яңа идеяләр очраша, хезмәттәшлек туа һәм киләчәк максатлар билгеләнә торган урын. Без игелекле Татарстанны булдыруга керткән өлешләре өчен барыгызга да рәхмәт белдерәбез.

«Игелекле Татарстан» форумы 2023 елдан башлап ТР Яшьләр эшләре министрлыгы ярдәмендә волонтерларны бүләкләү һәм җәмгыять, хакимият һәм бизнес арасында диалогны үстерү өчен Республиканың мәгълүмати-ресурс үзәге тарафыннан үткәрелә.