Татарстан халкы Дәүләт хезмәтләре аша юристка языла ала

Дәүләт хезмәтләре порталында юрист ярдәме кирәк булган кешеләр өчен уңайлы хезмәт эшли башлады. Хәзер республика халкы, өйләреннән чыкмыйча гына, дәүләт юридик бюросына кабул итүгә языла ала. Сервис «Тормыш ситуацияләре» бүлегендә эшли һәм аралашу форматын сайларга мөмкинлек бирә — белгеч белән шәхсән очрашырга, телефоннан сөйләшергә яки онлайн консультация алырга. Цифрлы сервисларны үстерү «Мәгълүмат икътисады» милли проекты буенча бара.

Кабул итүгә эләгү өчен Дәүләт хезмәтләрендә шәхси кабинетка кереп, каталогта кирәкле бүлекне табып, гариза тутыру да җитә. Формада төбәкне, ташламалы категорияне күрсәтергә һәм вәзгыятьне җентекләп тасвирларга кирәк булачак. Әгәр гариза башка кеше өчен бирелә икән, аның мәнфәгатьләрен яклау хокукын раслый торган документны теркәргә кирәк. Яшәү урыны теркәлү урыныннан аерылган очракта, факт буенча яшәү адресын күрсәтү мөһим.

Гариза җибәрелгәннән соң, язылу турында хәбәр шәхси кабинетка бер эш көне эчендә киләчәк. Шәхси кабул итүне сайлаганнарга үзләре белән паспорт, бушлай ярдәмгә хокук турындагы документ һәм эш буенча барлык материаллар булырга тиеш.

Түләүсез юридик ярдәмгә исәп тота алган гражданнар категорияләренең тулы исемлеге һәм мөрәҗәгать итәргә мөмкин булган мәсьәләләр исемлеге Татарстан Юстиция министрлыгының рәсми сайтында урнаштырылган. Яңа сервис хокукый ярдәм алу мөмкинлеген гадиләштереп кенә калмый, ә еш кына үзләрен дәүләт структуралары итеп күрсәтә торган мошенниклардан сакланырга да ярдәм итә.