Татар Такталыдан Мисәлимовлар гаиләсе ТР Рәисе чарасында катнашты

Татар Такталыдан Мисәлимовлар гаиләсе Татарстан Республикасы Рәисе һәм аның тормыш иптәше Татарстанның иң яхшы гаиләләре хөрмәтенә оештырган чарада катнашты.

Күп балалы Мисәлимовлар гаиләсенең стажы 40 елдан артык. Ике кыз һәм бер малайны лаеклы кешеләр итеп тәрбияләгәннәр. Балалары инде үз гаиләләрен корып, әти-әниләренә дүрт онык бүләк иткәннәр. Уллары Илдар хәзер хәрби операциядә.

Мисәлимовлар бөтен гомерләрен намуслы һәм тырыш хезмәткә багышлаганнар. Гаилә башлыгы Назыйм Нуриәхмәт улы үзенең хезмәт юлын авыл хуҗалыгына, туган җиренә, туган авылына багышлаган. Хезмәт стажы кырык дүрт ел тәшкил итә. Мәрьям Рәфәгать кызы Татар Такталыга Чуашстаннан күчеп килгән. 1981 елдан Аграмак авыл җирлегендә эшләгән. Биредә ул төрле урыннарда – сыер савучы, санитарка була. Аның эш стажы утыз биш ел тәшкил итә.

Хәзер Мисәлимовлар шәхси хуҗалыкларында мөгезле эре терлекне күпләп асрыйлар. Авылда тормыш итү җиңел түгел. Шуңа күрә авыл хуҗалыгында эшләүчеләрнең барысы да хезмәт сөючән, сабыр, гаять зур ихтыяр көченә ия кешеләр. Мисәлимовлар да нәкъ шундыйлардан.