Спас өлкәннәр йортында яшәүчеләр янгын частендә экскурсиядә булдылар

Һөнәри бәйрәм — Россия Федерациясе Коткаручысы көне алдыннан 132нче янгын сүндерү-коткару частендә Спас өлкәннәр һәм инвалидлар йортыннан килгән кунаклар өчен ачык экскурсия булды.

Икенче каравыл начальнигы Альберт Ильясов янгын сүндерүчеләрнең көндәлек тормышы, янгын куркынычсызлыгының төп кагыйдәләре турында сөйләде һәм заманча индивидуаль саклану чараларын күрсәтте. Янгыннарны сүндерү ысулларына һәм махсус киемнәргә аерым игътибар бирелде. Теләгән һәркем янгын сүндерүче-коткаручының стандарт экипировкасының гомуми авырлыгын белеп кенә калмыйча, аны үзендә дә киеп карый алды.

Кунакларда янгын сүндерү техникасы аеруча зур кызыксыну уятты. Часть хезмәткәрләре махсус автомобильләрнең төзелешен һәм нәрсә белән җиһазландырылганын, шулай ук аларның эштә ничек кулланылуын җентекләп аңлаттылар.

Бүлекчәдә билгеләп үтүләренчә, мондый чаралар төрле яшьтәге кешеләр өчен мөһим. Алар янгын куркынычсызлыгы турында белем дәрәҗәсен күтәрә һәм профилактика эшенең нәтиҗәле өлеше булып тора.