Сергей Нечаев Муса Җәлилнең 120 еллыгы уңаеннан Плетцензее мемориалына чәчәкләр салды

26 февраль көнне Берлиндагы Плетцензее мемориалында Муса Җәлилнең тууына 120 ел тулу уңаеннан искә алу тантанасы узды. Нәкъ менә монда 1944 елның августында шагыйрь һәм яшерен төркемнең башка катнашучылары нацистлар суды карары буенча җәзалап үтерелә.

Россиянең Германиядәге илчесе Сергей Нечаев дипмиссия һәм Рус йорты хезмәткәрләре, шулай ук татар диаспорасы вәкилләре һәм ватандашлары белән бергә мемориаль комплекска чәчәкләр һәм веноклар салды. Тантана вакытында Җәлилнең «Случается порой» шигыре яңгырады — аны чарада катнашучыларның берсе укыды.

Җыелганнар алдында чыгыш ясап, Нечаев сугыш тәмамланганнан соң дистә еллар узуына карамастан, совет кешеләренең батырлыклары турындагы хәтер тарихны яңадан язарга тырышучылар өчен максат булып кала, дип ассызыклады.

"Безнең бурыч - дөреслекне җиткерү, бигрәк тә яшьләргә, буыннар Җиңүнең нинди бәя белән алынуын истә тотсын өчен", - дип белдерде дипломат.

Ул шулай ук билгеләп үткәнчә, Плетцензее төрмәсендә Җәлил генә түгел, ә Татарстанда туган башка кешеләр — антифашист хәрәкәтендә катнашучылар да һәлак булган. 1945 елның апрелендә Кызыл Армия гаскәрләре тарафыннан азат ителгән бу комплекс россиялеләр өчен аерым хәтер урыны булып кала.

Плетцензее - нацистлар террорының иң фаҗигале символларының берсе: 1933 елдан 1945 елга кадәр биредә ике дистә илдән 2800дән артык кеше җәзалап үтерелгән. Бүген мемориалга ел саен меңләгән кеше килә. Татар подпольщиклары истәлегенә аның территориясендә аерым мемориаль такта куелган.