Икенче мәктәп укучысы һөнәри осталык конкурсында алтын медаль алды

Шәһәрнең икенче урта мәктәбе укучысы Полина Никифорова «Профессионаллар» Бөтенроссия һөнәри осталык чемпионатының төбәк этабында «Мода технологиясе» компетенциясендә беренче урынны яулады. 

Чемпионат 3 февральдән 7 февральгә кадәр Казан технология һәм дизайн колледжы мәйданчыгында узды. Анда Казан, Чистай, Бөгелмә, Мамадыш, Болгар, Питрәч районыннан укучылар һәм һөнәри училище студентлары катнашты. 

Икенче мәктәп укучысы бик яхшы әзерлек, тегү эшләнмәләрен конструкцияләү һәм әзерләү технологияләре буенча белем һәм күнекмәләрен күрсәтә алды. 

Полинага диплом һәм алтын медаль тапшырылды. Тиздән аңа чемпионатның Калугада узачак Бөтенроссия этабы ярымфиналында чыгыш ясарга кирәк булачак. 

Укучыны һөнәри осталык буенча ярышларга 2нче мәктәпнең технология укытучысы Ольга Выжленкова әзерләгән.