Иске Рәҗәптән Фәйзиевлар гаиләсе – конкурс җиңүчеләре

Иске Рәҗәптә яшәүче Фәйзиевлар гаиләсе «Эхо веков в истории семьи – Тарихта без эзлебез» шәҗарәләр конкурсының муниципаль этабында җиңеп чыкты.

Гаилә жюри әгъзаларына һәм тамашачыларга үзләренең педагогик династиясе турында сөйләде. Ә ул аз да, күп тә түгел – 310 ел тәшкил итә! Гаилә бер мәктәптә укытса, укытучыларга урыннар җитмәс иде. Алар арасында тел белгече дә, биолог та, тарихчы да, башлангыч класслар укытучысы да бар.

Фәйзиевлар үз чыгышларында һөнәрләренә булган мәхәббәтен тулысынча ачып бирергә тырыштылар, гаиләнең казанышлары һәм уңышлары турында сөйләделәр, гаилә альбомындагы фотолар белән таныштырдылар.

Моннан тыш, һәр гаилә нинди дә булса милли ризык әзерләп килергә тиеш иде. Фәйзиевлар бу конкурста да сынатмадылар.

«Спас районында үрнәк гаиләләр шактый. Алар саны елдан-ел арта барыр, дип ышанам. Традицияләр, буыннар бәйләнеше турында беркайчан онытырга ярамый. Бу гаиләне ныгыта” – дип билгеләп үтте мәгариф бүлеге җитәкчесе урынбасары Людмила Рыбакова.

Тиздән Фәйзиевлар гаиләсе Спас районы данын конкурсның зона этабында якларга тиеш.