Болгарда чираттагы авыл хуҗалыгы ярминкәсе булды

Бүген Болгарның Базар мәйданында авыл хуҗалыгы җитештерүчеләренең чираттагы ярминкәсе узды. Бу юлы фермерлар тәкъдим иткән товарлар ассортименты шактый бай булды.

Шәһәр халкы үтенечләрен исәпкә алып, фермерлар бу юлы яңы суйган итне күбрәк алып килгәннәр. Шулай ук сатып алучыларга сөт, бал, башка умартачылык продукциясе дә тәкъдим ителде, ә сатуга куелган балыкны аз гына вакыт эчендә алып та бетерделәр.

Шулай ук ярминкәдә он, ашлык, печән, төрле яшелчәләр дә бар иде. Яз айларында кишер бәяләрен нык артуын онытмаган сатып алучылар кишерне дә күпләп алдылар.

Исегезгә төшерәбез, һәр шимбә үткәрелә торган мондый ярминкәләрдә кирәкле азык-төлекне очсыз бәядән сатып алырга мөмкин.