Болгарда Идел Буе Болгарының борынгы шәһәрләре турында 40тан артык картина күрсәтеләчәк

Болгар цивилизациясе музеенда 1 июльдә «Тарихлар кәрваны» күргәзмәсе ачыла. Экспозициядә Идел буе Болгарының өч борынгы шәһәрендә – Болгарда, Биләрдә һәм Юкәтауда (хәзерге Чистай) пленэрлар вакытында Татарстан Рәссамнар берлеге әгъзалары тарафыннан язылган 40тан артык картина бар.

Сәнгать экспедицияләре 2025 елның җәендә узды. Аларда 20дән артык рәссам катнашты, алар арасында Татарстанның халык рәссамы Рабис Сәләхов, Григорий Эйдинов, Михаил Кузнецов, Илнур Сираҗиев, Вәгыйз Камалетдинов һәм башкалар. Һәрбер эш –борынгы шәһәрләрнең тарихына һәм мәдәниятенә чуму нәтиҗәсе. Рәссамнар галимнәр, музейчылар һәм җирле халык белән эшләгәннәр.

"Без ун көн дәвамында тарихи материал җыйдык. Безнең белән тарихчылар, музейчылар эшләде”, — дип уртаклашты Татарстанның халык рәссамы Рабис Сәләхов.

Күргәзмә 2026 елда игълан ителгән «Казан — ислам дөньясының мәдәни башкаласы» елына багышланган. Элегрәк “Тарихлар кәрваны" Казан Кремлендәге Татар халкы дәүләтчелеге тарихы музеенда уңышлы узды. Ул чакта Болгар музей-тыюлыгы директоры Рамил Җиһаншин: "Картиналар бик матур. Алдагы күргәзмә Болгар музей-тыюлыгында планлаштырыла, ул Идел буе Болгар дәүләтендә 922 елда ислам динен кабул итүнең чираттагы датасына туры китереләчәк" диде.

Болгарда экспозиция 31 июльгә кадәр эшләячәк. Аннары картиналар җәй ахырында юбилеен билгеләп үтәчәк Чистайга юл тотачак.