Реконструкция тулы көч белән бара

Бу эшкә барлыгы җитмешкә якын кеше җәлеп ителгән, аларның күпчелеге - "Энергостройсервис" белгечләре. Безнекеләргә дә эш җитәрлек, чөнки хәзерлек чаралары Спас районы электр челтәрләре хезмәткәрләренең тырышлыгы белән башкарыла. Эш көне буе туктап тормый. Кыш көне реконструкциягә бәйле эшләрнең 70 процентын башкарып чыгу күздә тотыла. Энергетиклар үз бурычларын вакытында башкарып чыгачак.

Моның өчен махсус техника - кран-автокүтәргечләр, бурлар, манипуляторлар һәм башкалар җәлеп ителә. Энергетикларның тырышлыгы белән бергә, болар барысы да реконструкцияне кыска вакыт эчендә башкарып чыгарга мөмкинлек бирәчәк. Күпмедер вакыт утны өзеп торырга туры киләчәк, шәһәр халкының күпчелеге моны аңлый, чөнки үзгәртүләрнең шәһәрне электр энергиясе белән ышанычлы тәэмин итүгә юнәлдерелгәнен яхшы белә.