Спас районы шәхси ярдәмче хуҗалыкларны үстерү буенча Татарстанда алдынгылар рәтенә кергән

Спас районында шәхси ярдәмче хуҗалыкларга ярдәм итү программасы актив үсеш ала. Ул быел Татарстан Республикасы Министрлар Кабинетының 2025 елның 20 маендагы 339 номерлы карары нигезендә башланды. Аның төп максаты – шәхси ярдәмче хуҗалык тотучыларга товар үгезләре сатып алу чыгымнарының 50% ка кадәрен кайтару.

Район буенча нәтиҗәләр үзләре үк сөйли. Бүгенге көнгә җирле шәхси ярдәмче хуҗалыклардан 11 гариза хупланган. Түләнгән субсидияләрнең гомуми суммасы 2,3 миллион сумнан артып киткән. Бу акчаларга 114 баш яшь терлек сатып алынган. Шул ук вакытта бер хуҗалыкка 15 баштан артык үгез сатып алынмый — мондый чикләү программада билгеләнгән.

Ким, Куралово һәм Урта Йорткүл авыл җирлекләрендә яшәүчеләр аеруча активлык күрсәткәннәр. Нәкъ менә монда иң күп яшь терлек сатып алганнар. 

"Мондый ярдәм нәтиҗәсендә безнең район шәхси ярдәмче хуҗалыкларны үстерү буенча республикада алдынгы урыннарның берсен били, — дип билгеләп үтте Спас районы башлыгы Роман Исланов. – Без программаның кирәклеген күрәбез, терлекчеләребез үз хуҗалыкларын үстерергә әзер. Бу администрациянең һәм фермерларның үзләренең уртак эшенең яхшы нәтиҗәсе".

Моннан тыш, быелдан яңа ярдәм чарасы кертелгән – бер баш сарык һәм ярка өчен 1000 сум. Ике сайлап алу йомгаклары буенча акчалар 1032 баш вак мөгезле терлек асрауга бирелгән инде.

Гомумән алганда, Татарстан буенча кече хуҗалыкларга ярдәм итүгә 2026 елда 1,8 миллиард сум юнәлдерелгән – бу узган ел белән чагыштырганда 300 миллионга күбрәк. Республикада 398 меңгә якын шәхси ярдәмче хуҗалык исәпләнә, алар өлешенә барлык терлекләрнең өчтән бер өлеше һәм җитештерелә торган бәрәңге һәм яшелчәләрнең 75% тан артыгы туры килә.